लोकशाही एक्सप्रेस न्यूज नेटवर्क
गोंदिया भंडारा सह पूर्व विदर्भात पावसाची संततधार कोसळत असून गेल्या दोन दिवसापासून गोंदियात पावसाचा जोर कायम आहे. या दरम्यान मुसळधार पावसाने अनेकांची घरे कोसळलेली आहेत .गोरेगाव तालुक्यातील मोहाडी येथेही घराचे नुकसान झाले .त्या घरांची पाहणी करण्यासाठी गोंदिया जिल्हा परिषदेचे बांधकाम सभापती डॉ. लक्ष्मण भगत, ग्रामपंचायतचे सरपंच नरेंद्र चौरागडे व पदाधिकारी मोहाडी गावात दाखल होऊन पंचनामे करण्याचे निर्देश संबंधित विभागाच्या अधिकाऱ्यांना दिले आहेत.
जिल्ह्यात मागील दोन दिवसांपासून संततधार पाऊस सुरू असलेल्यामुळे अनेक भागांत जनजीवन विस्कळीत झाले आहे. या पावसाचा फटका जिल्हा परिषद क्षेत्र अंतर्गत मुंडीपार येथील मोहाडी गावालाही बसला आहे.
या पावसामुळे श्रीमती सायन बाई सुरजलालजी बिसेन यांच्या राहत्या घराची भिंत कोसळून मोठ्या प्रमाणात पडझड झाली. घरातील वस्तूंचे आणि मालमत्तेचे मोठे नुकसान झाले असले तरी सुदैवाने कोणतीही जिवीतहानी झाली नाही. मात्र या दुर्घटनेमुळे बिसेन कुटुंब आर्थिक अडचणीत सापडले आहे.
घटनेची माहिती मिळताच डॉ. लक्ष्मणजी भगत (अर्थ व बांधकाम सभापती, जिल्हा परिषद गोंदिया), गावाचे सरपंच श्री नरेंद्रजी चौरगडे, तंटामुक्त समिती अध्यक्ष श्री लिखीराम बघेले यांच्यासह अनेक ग्रामस्थांनी तात्काळ घटनास्थळी भेट दिली.
डॉ. भगत यांनी संबंधित अधिकाऱ्यांना त्वरित पंचनामा करण्याचे निर्देश दिले असून, योग्य ती मदत लवकरात लवकर दिली जाईल, असे आश्वासन दिले.
स्थानिक ग्रामस्थांनी देखील तत्काळ मदतीसाठी पुढाकार घेतला असून प्रशासनाकडून लवकरात लवकर आवश्यक ती मदत मिळावी, अशी अपेक्षा व्यक्त केली जात आहे.
