गोरेगाव : मोबाईल फोनवर दलित समाज बांधवांना अश्लील शिवीगाळ करणार्‍या व्यक्तीच्या विरोधात पोलिसात तक्रार दाखल करण्यात आली मात्र पोलिसांकडून अदखलपात्र गून्हा दाखल करण्यात आला आहे. या प्रकरणाची सखोल चौकशी करून गुन्हेगारावर कारवाई करावी. अन्यथा दलित समाज बांधवांच्या वतीने भिम आर्मी, वंचित बहुजन आघाडी व शिवसेना उबाठाच्या नेतृत्वात आंदोलन करण्यात येईल, अशी माहिती गोरेगाव तालुक्यातील कलपाथरी येथील प्रज्वल बोरकर, प्रतिक बोंबार्डे व समाज बांधवांनी (ता. 23) गोरेगाव येथे आयोजित पत्रकार परिषदेतून दिली.
यावेळी पत्रकार परिषदेत शाम डोंगरे, प्रज्वल बोरकर, प्रतिक बोबांर्डे, शुभम डोंगरे, गौतम रामटेके, मयुर डोंगरे, विनोद बोरकर, चंद्रकुमार बोरकर, सिद्धार्थ रामटेके, आकाश बोरकर, अतुल डोंगरे,ओमदास मेश्राम आदी उपस्थित होते.
यावेळी प्रज्वल बोरकर यांनी सांगितले की, कलपाथरी येथील ग्राम पंचायत सदस्य दुर्योधन कोरे वय ३० वर्ष यांनी २४ नोव्हेंबरला तुषार प्रधान यांच्या मोबाईल नंबरवर प्रज्वल बोरकर व दलित समाजाला जातीयवाचक शिवीगाळ केली. दरम्यान, त्यांनी मोबाईल रेकॉर्डींगच्या आधारे गोरेगाव पोलिसात तक्रार दाखल केली. मात्र, पोलीसांनी मोबाईल रेकॉर्डिंगची शहानिशा न करता अदखलपात्र प्रकरण दाखल करून न्यायालयात दाद मागण्याची समज दिली.
यावर या प्रकरणाची सखोल चौकशी व्हावी व गुन्हेगारावर गुन्हा दाखल करण्यात यावा याकरिता पोलीस अधीक्षक गोंदिया यांच्याकडे २ डिसेंबर रोजी तक्रार केली. तरी देखील आतापर्यंत आरोपींच्या विरोधात गुन्हा दाखल करण्यात आलेला नाही.
संबंधित व्यक्तीवर कारवाई करून न्याय द्या अशी मागणी प्रज्वल बोरकर यांच्यासह कलपाथरी येथील दलित समाज बांधवांनी केली आहे. तर या प्रकरणात भिम आर्मी, बहुजन वंचित आघाडी व शिवसेना (उबाठा) लाही निवेदन सादर करण्यात आले असून दोन दिवसात संबंधितावर कारवाई न झाल्यास या संघटनांच्या मार्गदर्शनात कलपाथरी येथील दलित समाज बांधव आंदोलन करणार असल्याची माहीती प्रज्वल बोरकर यांनी पत्रकार परिषदेत दिली.
. भरत घासले
. भरत घासले 
